ЧОНЕМЖЕ САМЫРЫК ТУГАК

Урем дене кая шкетак коча

Изишак пӱгыр, кидыште - тоя

Йырваш тӱслен да куанен онча

Шинчаже ялт полмезе да чоя.

Ужеш коча: йоча-влак юарлат

Куржталыт, модыт, поктылыт вашла

Онча ӱмбакышт - чонжо ден шкежат

Провор йочала куржталеш пырля

Эх, кушто мыйын рвезе пагытем?

Ом керт мый тудым ынде пӧртылтен

Те палыза: капем туртеш гынат

Чонемже самырык тугак

А теве ӱдыр ошкылеш мотор

Мардеж дене ош ӱпшӧ лойгалтеш

Онча коча почешыже мочол

А чонжо ӱдырым поктен куржеш

Ола бульварыш калык погынен

Шоктен-мурат, а кӧ гын кушталта

Ала-кунам кочат тыге моштен

А кызыт чонжо веле юарла

Эх, кушто мыйын рвезе пагытем?

Ом керт мый тудым ынде пӧртылтен

Те палыза: тек куптырга шÿргем

Тугаяк самырык чонем